د افغان ننک ويب پاڼې د شعرونو برخې ته ښه راغلاست!

سر به مې بایلي وي خو ننګ مې لا بایللی نه دی
توره مې زنګه نه ده شرنګ مې لا بایللی نه دی
لږ انتظار دی ستا دعرش دمنارو حکم له
وخت غړبوجن یم ګني جنګ مې لا بایللی نه دی
ترینه تاویږم که هر څو مې وزرونه سوزي
زړه دافغان خوی دپتنګ مې لا بایللی نه دی
په سندوسي جامو کې خاندي پسرلي دقدرت
نکهت راخور یمه لونګ مې لا باللی نه دی
شم به وږمه په ترنم دسباوون زیري ته
خو شپه اوږده ښکاري پلنګ مې لا بایللی نه دی
په بیلتانه کې دې پوخته کړم عشقه دادې منم
مشر به یم بې شک خو رنګ مې لا باللی نه دی
نن یې پر شنډو ژبه راښکله چې اخ کاروانه
د وینو غوړپ غواړم قلنګ مې لا بایللی نه دی
نور علي شاه کاروان
متحده عربي امارات ابوظبي